2 Endringar i statsbudsjettet for 2012
Kap. 1800 Olje- og energidepartementet
Post 01 Driftsutgifter
Etter terroranslaget mot regjeringskvartalet 22. juli 2011 har Olje- og energidepartementet vore lokalisert i midlertidige lokale på Majorstua. Departementet har i løpet av 2012 flytt inn i lokale i regjeringskvartalet (R5). Dette har medført ekstraordinære utgifter for Olje- og energidepartementet knytte til flytting, anskaffingar og tiltak for å etablere tilfredsstillande arbeidsforhold i R5.
Ved kongeleg resolusjon 14. september 2012 vart det gitt samtykke til å overskride løyvinga under kap. 1800 Olje- og energidepartementet, post 01 Driftsutgifter med inntil 5 mill. kroner for utgifter knytte til flyttinga mv. som vil komme til i 2012.
Meirutgiftene for departementet i samband med flyttinga omfattar investeringar i tilknyting til kontor, møterom, fellesområde, oppgradering av AV-utstyr, anskaffing av møblar, telefonar og anna utstyr, flytting av utstyr mv. frå Majorstua og lageret på Ensjø.
På bakgrunn av oppdatert oversikt over ekstraordinære utgifter og utgiftene knytte til flyttinga mv., er meirutgiftene justerte ned til om lag 4,5 mill. kroner. Det er lagt opp til å kunne dekkje i storleiksorden 2 mill. kroner innanfor eksisterande budsjettrammer. Med bakgrunn i dette er det foreslått ei tilleggsløyving på 2,5 mill. kroner i 2012.
Nytt forslag til løyving er om lag 159,9 mill. kroner.
Kap. 1810 Oljedirektoratet
Post 21 Spesielle driftsutgifter, kan overførast
Det blir foreslått å redusere løyvinga knytt til Oljedirektoratets oppdrags- og samarbeidsverksemd med 5 mill. kroner. Endringa har hovudsakeleg samanheng med lågare aktivitetsnivå enn tidlegare budsjettert knytt til samarbeidsprosjektet Force. Utgiftsreduksjonen motsvarer ein tilsvarande inntektsreduksjon under kap. 4810, post 02 Oppdrags- og samarbeidsverksemd. Det er ei uvisse knytt til omfanget av oppdrags- og samarbeidsverksemda.
Nytt forslag til løyving er 457,1 mill. kroner.
Kap. 1820 Noregs vassdrags- og energidirektorat
Post 01 Driftsutgifter
Det blir foreslått å redusere løyvinga knytt til NVEs tilsyn med økodesigndirektivet med 2,5 mill. kroner. Reduksjonen har samanheng med at ei gebyr-/avgiftsordning ikkje er på plass. Utgiftsreduksjonen motsvarer ein tilsvarande inntektsreduksjon under kap. 4820, post 01 Gebyrinntekter.
Nytt forslag til løyving er 446,95 mill. kroner.
Kap. 1833 CO2-handtering
Post 21 Spesielle driftsutgifter, kan overførast
Fullskala CO2-handtering på Mongstad – Mongstad Steg 2
Budsjettet knytt til planlegging og førebuing av fullskala CO2-fangst på Mongstad er foreslått redusert med 264 mill. kroner i 2012, frå 705 til 441 mill. kroner. Reduksjonen knyter seg i hovudsak til at bemanninga i prosjektteamet har vore lågare enn venta, kontraktane for engineering og teknisk assistanse er inngått med lågare verdi og arbeidsomfanget knytt til aminstudiar er noko redusert.
Vidare er eigaroppfølgingskostnadene til Gassnova SF foreslått reduserte med 3 mill. kroner, til 34 mill. kroner i 2012. Reduksjonen skuldast i hovudsak at aktiviteten innanfor eksterne studiar vil bli noko lågare enn tidlegare anteke.
Transport og lagring av CO2
Budsjettet knytt til transport og lagring av CO2 frå Mongstad er foreslått redusert med 29 mill. kroner i 2012, frå 127 til 98 mill. kroner.
Gassnova arbeider med utgreiing av transport- og lagringsløysingar for CO2 frå Mongstad. I løpet av siste halvdel av 2011 og 2012 er merksemda i større grad retta mot å arbeide fram forslag til organisering av eigarskap og gjennomføring. Gassnova har gjort dette arbeidet i samråd med departementet. Konkret teknisk arbeid med å kvalifisere lagerlokalisering vert avslutta i løpet av 2012. På bakgrunn av oppdaterte budsjettoverslag frå Gassnova er budsjettet for 2012 foreslått redusert med 22 mill. kroner, til 68 mill. kroner.
På transportsida arbeider Gassco AS med å etablere løysingar for røyrleidning frå Mongstad til eigna lager. Budsjettet for 2012 er foreslått redusert med 7 mill. kroner. Reduksjonen knyter seg til at småskala testing av støytårn er utsett til 2013. Vidare har det vore mindre behov for midlar til studiar enn først anteke.
CCS moglegheitsstudie
Gassnova skal gjennomføre eit utgreiingsarbeid der føremålet er å medverke til ei brei og oppdatert kartlegging av moglegheitsområdet for realisering av fullskala CO2-handtering utover prosjektet på Mongstad. Utgreiinga skal gi styresmaktene eit betre kunnskapsgrunnlag omkring moglege CO2-handteringsprosjekt i Noreg.
Totalt er budsjettbehovet for moglegheitsstudien redusert med 46 mill. kroner, frå 148 til 102 mill. kroner. Reduksjonen knyter seg hovudsakleg til at samla arbeidsomfang er redusert som følgje av at det ikkje er sett som nødvendig å gjennomføre idéstudiar (opphavleg budsjettanslag omfatta seks idéstudiar). Ein gjer merksam på at det framleis knyter seg uvisse til estimatet, blant anna som følgje av at Gassnova i løpet av 2012 vil vurdere om planlagt kolkraftverk på Svalbard kan vere relevant for CO2-handtering. Dette kan medføre endringar i totalanslaget for moglegheitsstudien.
På bakgrunn av det nye totalanslaget for studien, er budsjettet for 2012 foreslått redusert med 28 mill. kroner, frå 57 til 29 mill. kroner.
Ekstern bistand
Det har vore mindre behov for ekstern bistand i 2012 knytt til blant anna kvalitetssikring, juridiske og organisatoriske problemstillingar og statsstøtteregelverk i samband med statleg engasjement i CO2-handteringsprosjekt. På den bakgrunnen er budsjettet for 2012 foreslått redusert med 9 mill. kroner.
Oppsummering
På bakgrunn av endringane nemnde ovanfor er løyvinga foreslått redusert med totalt 333 mill. kroner.
Nytt forslag til løyving er 617 mill. kroner. Disponibelt budsjett under posten, inkludert overførte midlar frå 2011, utgjer totalt om lag 725 mill. kroner for 2012.
Post 71 Forskingstenester, TCM DA, kan overførast
Løyvinga til kjøp av forskingstenester dekkjer nedbetaling av lån og driftsutgifter ved teknologisenteret på Mongstad. Kjøp av forskingstenester er budsjettert til 697 mill. kroner i 2012, ein auke på netto 28 mill. kroner i forhold til gjeldande budsjett for 2012.
Det er anslått at staten sin del av driftskostnadene vil auke med 33 mill. kroner i forhold til det som vart lagt til grunn i revidert budsjett 2012. Dette skuldast forskyving av inntekter frå 2012 til 2013 frå Aker Clean Carbon som følgje av forseinka start av aminanlegget. Inntektene frå Aker Clean Carbon er tekne omsyn til i løyvinga som er foreslått i Prop. 1 S for 2013.
Tilbakebetalinga av lånet starta i oktober 2012. Utgifter til nedbetaling av lånet er reduserte med 10 mill. kroner som følgje av at renta på lånet til TCM DA er redusert, jf. kap. 4833, post 80. Reduksjonen skuldast at rentesatsen er justert ned frå 4 til 3,25 pst.
Ovannemnde endringar medfører ein netto auke i utgifter til meirverdiavgift på 5 mill. kroner.
Kap. 1870 Petoro AS
Post 71 Unitisering, kan overførast
Løyvinga til arbeidet med unitiseringa av Johan Sverdrup-funnet blir foreslått redusert med 5 mill. kroner. Endringa skuldast ei anna fordeling av kostnadene over tid enn tidlegare lagt til grunn. Totalt er Petoro sin del av dette arbeidet rekna til å bli inntil 80 mill. kroner i perioden 2012-214.
Nytt forslag til løyving for 2012 er 35 mill. kroner.
Kap. 2440/5440 Statens direkte økonomiske engasjement i petroleumsverksemda
Grunnlaget for forslaget til nye løyvingar kjem frå ein oppdatert prognose for 2012 frå Petoro. Denne prognosen er basert på rekneskapsføring for inntekter og utgifter per 30. september 2012 og overslag for resten av året.
Kap. 5440, underpost 24.1 Driftsinntekter blir auka med 6 100 mill. kroner, frå 197 400 til 203 500 mill. kroner. Endringa skuldast hovudsakleg at venta gasspris og -volum for 2012 er høgare enn det som vart lagt til grunn i revidert budsjett 2012.
Kap. 5440, underpost 24.3 Leite- og feltutviklingsutgifter blir redusert med 500 mill. kroner, frå 2 800 til 2 300 mill. kroner som følgje av omprioriteringar av leiteaktivitetar og utsette leitebrønnar.
Kap. 5440, underpost 24.4 Avskrivingar blir auka med 600 mill. kroner, frå 18 400 til 19 000 mill. kroner. Endringa skuldast auka sal av gass.
Kap. 5440, underpost 24.5 Renter av statens kapital blir redusert med 200 mill. kroner, frå 6 800 til 6 600 mill. kroner. Endringa skuldast hovudsakleg oppdatering av overslag for statens faste kapital. Kalkulatorisk rente for 2012 er basert på ein rentesats på 2,81 pst.
Endringane nemnde ovanfor fører til at kap. 5440, post 24 Driftsresultat blir auka med 6 200 mill. kroner, frå 137 200 til 143 400 mill. kroner.
Tabell 2.1 Endringar på statsbudsjettet 2012 under kap. 2440/5440 Statens direkte økonomiske engasjement i petroleumsverksemda (i mill. kroner)
Kap./post Underpost | Nemning | Gjeldande løyving1 | Forslag til ny løyving | Endring | ||
|---|---|---|---|---|---|---|
2440 | 30 | Investeringar | 26 000 | 26 000 | 0 | |
Sum kap. 2440 | 26 000 | 26 000 | 0 | |||
5440 | 24.1 | Driftsinntekter | 197 400 | 203 500 | 6 100 | |
24.2 | Driftsutgifter | -32 200 | -32 200 | 0 | ||
24.3 | Leite- og feltutviklingsutgifter | -2 800 | -2 300 | 500 | ||
24.4 | Avskrivingar | -18 400 | -19 000 | -600 | ||
24.5 | Renter av statens kapital | -6 800 | -6 600 | 200 | ||
24 | Driftsresultat | 137 200 | 143 400 | 6 200 | ||
30 | Avskrivingar | 18 400 | 19 000 | 600 | ||
80 | Renter av statens kapital | 6 800 | 6 600 | -200 | ||
Sum kap. 5440 | 162 400 | 169 000 | 6 600 | |||
Kontantstraum frå SDØE: | ||||||
| Innbetalingar2 | 197 400 | 203 500 | 6 100 | |||
| Utbetalingar3 | 61 000 | 60 500 | -500 | |||
Nettokontantstraum frå SDØE | 136 400 | 143 000 | 6 600 | |||
1 Gjeldande løyving for 2012 er basert på Stortingets løyvingsvedtak av 12. desember 2011 og seinare endringar i 2012 (revidert budsjett), jf. Prop. 111 S og Innst. 375 S (2011-2012).
2 Innbetalingar = driftsinntekter
3 Utbetalingar = driftsutgifter + leite- og feltutviklingskostnader + investeringar
Desse endringane medfører samla sett at netto kontantstraum frå SDØE aukar med 6 600 mill. kroner, frå 136 400 til 143 000 mill. kroner.
Kap. 2490 NVE Anlegg
Kap. 2490, underpost 24.1 Driftsinntekter blir foreslått auka med 34 mill. kroner, frå 56 mill. kroner til 90 mill. kroner. Driftsinntektene aukar som følgje av auka omsetning i samband med flaum- og skredhendingar i Trøndelag og på Austlandet og Vestlandet våren/sommaren 2012.
Kap. 2490, underpost 24.2 Driftsutgifter blir foreslått auka med 34 mill. kroner, frå 49,5 mill. kroner til 83,5 mill. kroner. Driftsutgiftene aukar som følgje av auka aktivitet i samband med ovannemnde flaum- og skredhendingar.
Post 24 Driftsresultat
Tabell 2.2 Endringar under kap. 2490 NVE Anlegg (i 1 000 kr)
Kap./post/ underpost | Nemning | Gjeldande overslag | Nytt overslag | Endring | ||
|---|---|---|---|---|---|---|
2490 | 24.1 | Driftsinntekter | -56 000 | -90 000 | -34 000 | |
24.2 | Driftsutgifter | 49 500 | 83 500 | 34 000 | ||
24.3 | Avskrivingar | 5 400 | 5 400 | 0 | ||
24.4 | Renter av statens kapital | 1 100 | 1 100 | 0 | ||
24 | Driftsresultat | 0 | 0 | 0 | ||
Endringane i underpostar fører ikkje til endring i driftsresultatet for NVE Anlegg under kap. 2490, post 24 i høve til gjeldande løyving for 2012.
Kap. 4810 Oljedirektoratet
Post 02 Oppdrags- og samarbeidsverksemd
Løyvinga blir foreslått redusert med 5 mill. kroner, jf. omtale og tilsvarande reduksjon av løyvinga under kap. 1810, post 21.
Nytt forslag til løyving er 143,4 mill. kroner.
Post 04 Sal av undersøkingsmateriale
Det vart i 2011 bestemt at seismiske data frå områda utanfor Lofoten skulle leggjast ut for sal som datapakkar. Det er per utgangen av september selt tolv pakkar for 43,2 mill. kroner stykket eks. meirverdiavgift, ein auke på éin pakke i forhold til gjeldande budsjett 2012.
Løyvinga under posten har ved ein feil inkludert meirverdiavgift og blir derfor foreslått nedsett med 118,8 mill. kroner. Innbetalt meirverdiavgift blir innrapportert og betalt til skattestyresmaktene for føring i meirverdiavgiftssystemet og inntektsført på kap. 5521.
På denne bakgrunnen er posten foreslått redusert med netto 75,6 mill. kroner. Nytt forslag til løyving er 518,4 mill. kroner.
Kap. 4820 Noregs vassdrags- og energidirektorat
Post 01 Gebyrinntekter
Løyvinga er foreslått redusert med 2,5 mill. kroner, jf. omtale og tilsvarande reduksjon av løyvinga under kap. 1820, post 01.
Nytt forslag til løyving er 62,5 mill. kroner.
Kap. 4833 CO2-handtering
Post 80 Renter, TCM DA
Renteinntekter frå TCM DA er rekna til 37 mill. kroner i 2012, ein reduksjon på 10 mill. kroner i høve til gjeldande budsjett 2012. Reduksjonen skuldast at rentesatsen er justert ned frå 4 til 3,25 pst., jf. kap. 1833, post 71.
Kap. 5582 Sektoravgifter under Olje- og energidepartementet
Post 70 Bidrag til kulturminnevern
Det er fatta vedtak i to nye konsesjonssaker som NVE kan krevje inn avgift frå. Den første saka gjeld dei små reguleringsmagasina Elgsjø og marsjø (0,4 mill. kroner), den andre saka gjeld reguleringsmagasinet Tesse (2 mill. kroner).
På denne bakgrunnen blir det budsjettert med 2,4 mill. kroner i inntekter under posten i 2012.