2 Endringar i statsbudsjettet 2019
Kap. 1800 Olje- og energidepartementet
Post 21 Spesielle driftsutgifter, kan overførast, kan nyttast under post 72
Riksantikvaren disponerer midlar under posten til dekning av utgifter til kulturminneundersøkingar i regulerte vassdrag. Basert på vurderingar av framdrifta i dei ulike undersøkingane som går føre seg, vil delar av pågåande arbeid og utbetalingsbehov bli forskyvd til 2020.
Det er avsett midlar under posten til departementets oppfølging av arbeidet med å etablere eit fullskala demonstrasjonsprosjekt for fangst og lagring av CO2 i Noreg, blant anna kvalitetssikring av underlaget for investeringsavgjerda om fullskalaprosjekt for CO2-handtering i Noreg. Delar av arbeidet og utbetalingsbehovet blir forskyvd til 2020.
Det er foreslått å redusere løyvinga med 10 mill. kroner, til 16,5 mill. kroner.
Post 70 Tilskot til internasjonale organisasjonar mv.
Det er sett av 3,3 mill. kroner til Noregs økonomiske bidrag til ACER i 2019. Som følgje av at avgjerda om innlemming av den tredje energimarknadspakken i EØS-avtala, under dette forordninga om ACER, trådde i kraft 1. november 2019, vil det ikkje vere utgifter til ACER i inneverande år.
Det er foreslått å redusere løyvinga med 3,3 mill. kroner, til 3,7 mill. kroner.
Kap. 1810 Oljedirektoratet
Post 01 Driftsutgifter
Oljedirektoratet har motteke fleire søknader enn venta i samband med konsesjonsrunden i førehandsdefinerte område, TFO 2019, noko som gir auka arbeidsmengd til behandling av søknader. Arbeidet med å behandle konsesjonssøknader er gebyrfinansiert. Vidare skuldast auken meir tilsynsaktivitet.
Det er foreslått å auke løyvinga med 5,5 mill. kroner, til om lag 312,9 mill. kroner. Ein viser til tilsvarande inntektsauke under kap. 4810, post 01 Gebyrinntekter.
Post 23 Oppdrags- og samarbeidsverksemd, kan overførast
Utgifter til Oljedirektoratets samarbeidsavtale med Direktoratet for utviklingssamarbeid (Norad) om rådgiving innanfor petroleumsforvaltning for utviklingsland (Olje for utvikling) er anslått å bli 25 mill. kroner lågare enn gjeldande løyving. Reduksjonen skuldast mindre aktivitet i enkelte prosjekt som følgje av forseinka signering av nye institusjonsavtaler. Reduksjonen er delvis motsvara av auka utgifter til Diskos-samarbeidet (6,5 mill. kroner) som skuldast auka aktivitet. Det er sett i gang fleire prosjekt og det har vorte meir konsulentbistand enn opphavleg budsjettert.
På denne bakgrunnen er det foreslått å redusere løyvinga med 18,5 mill. kroner, til 100,5 mill. kroner. Ein viser til tilsvarande inntektsreduksjon under kap. 4810, post 02 Oppdrags- og samarbeidsinntekter.
Kap. 1820 Noregs vassdrags- og energidirektorat
Post 01 Driftsutgifter
Det er foreslått å redusere løyvinga med 2 mill. kroner, til om lag 571,4 mill. kroner. Ein viser til omtale og tilsvarande utgiftsauke under kap. 2490, post 45 Større utstyrsanskaffingar og vedlikehald.
Post 23 Oppdrags- og samarbeidsverksemd, kan overførast
Utgifter til internasjonale rådgivingsoppdrag og bistand innanfor vassdrags- og energisektoren, er anslått å bli 17 mill. kroner lågare enn gjeldande løyving. Reduksjonen har samanheng med mindre aktivitet og forseinkingar i ulike program.
På denne bakgrunnen er det foreslått å redusere løyvinga med 17 mill. kroner, til 72 mill. kroner. Ein viser til tilsvarande inntektsreduksjon under kap. 4820, post 02 Oppdrags- og samarbeidsinntekter.
Kap. 1840 CO2-handtering
Post 72 Fullskala CO2-handtering, kan overførast, kan nyttast under post 70
Ved Stortingets vedtak 21. juni 2019 vart det gitt ei tilleggsløyving på 150 mill. kroner og ei tilsegnsfullmakt på 195 mill. kroner til delfinansiering (75 prosent) av utgiftene til ein undersøkingsbrønn for CO2-lagring. Brønnen inngår i arbeidet med forprosjektering av fullskalaprosjektet for CO2-handtering. Undersøkingsbrønnen vil redusere uvissa i prosjektet. Statens utgifter til undersøkingsbrønn inklusive eventuelle utgifter ved fjerning, er samla avgrensa oppover til totalt 345 mill. kroner.
Equinors oppdaterte utbetalingsplan viser eit utbetalingsbehov i 2019 på om lag 180 mill. kroner mot tidlegare estimert 150 mill. kroner. Vidare har arbeidet med brønntesting og analyse auka. Resterande utbetalingsbehov på 165 mill. kroner er foreslått i budsjettet for 2020.
På denne bakgrunnen er det foreslått å auke løyvinga med 30 mill. kroner, til 329 mill. kroner.
Kap. 2440/5440 Statens direkte økonomiske engasjement i petroleumsverksemda
Tabell 2.1 Endring av løyvingar på statsbudsjettet 2019 under kap. 2440/5440 Statens direkte økonomiske engasjement i petroleumsverksemda (i mill. kroner)
Kap/post/ underpost | Gjeldande løyving 20191 | Forslag til ny løyving for 2019 | Endring | |
|---|---|---|---|---|
Kap. 2440 | ||||
30 | Investeringar | 29 000 | 27 000 | -2 000 |
Sum kap. 2440 | 29 000 | 27 000 | -2 000 | |
Kap. 5440 | ||||
24.1 | Driftsinntekter | 159 200 | 154 400 | -4 800 |
24.2 | Driftsutgifter | -27 400 | -30 500 | -3 100 |
24.3 | Leite- og feltutviklingsutgifter | -2 100 | -2 100 | - |
24.4 | Avskrivingar | -20 200 | -23 200 | -3 000 |
24.5 | Renter av statens kapital | -2 900 | -2 800 | 100 |
24 | Driftsresultat | 106 600 | 95 800 | -10 800 |
30 | Avskrivingar | 20 200 | 23 200 | 3 000 |
80 | Renter av statens kapital | 2 900 | 2 800 | -100 |
Sum kap. 5440 | 129 700 | 121 800 | -7 900 | |
Kontantstraum til SDØE: | ||||
Innbetalingar2 | 159 200 | 154 400 | -4 800 | |
Utbetalingar3 | 58 500 | 59 600 | 1 100 | |
Netto kontantstraum frå SDØE | 100 700 | 94 800 | -5 900 | |
1 Gjeldande løyving for 2019 er basert på Stortingets løyvingsvedtak av 18. desember 2018 og seinare endringar i 2019 (revidert budsjett), jf. Prop. 114 S (2018–2019) og Innst. 391 S (2018–2019)
2 Innbetalingar = driftsinntekter
3 Utbetalingar = investeringar + driftsutgifter + leite- og feltutviklingskostnader
Overslaget for kap. 2440, post 30 Investeringar er redusert med 2 000 mill. kroner, til 27 000 mill. kroner. Nedgangen skuldast lågare investeringsoverslag for fleire utbyggingar som Troll fase 3, Snorre/SEP og Johan Sverdrup, og utsetjing av enkelte mindre prosjekt. Det har òg vore lågare investeringar i produksjonsboring som følgje av seinare boreoppstart på Maria, og lågare driftsinvesteringar som følgje av optimalisering/prioritering av fleire mindre prosjekt. Reduksjonen er noko motverka av auka investeringar for offshore ferdigstilling av Martin Linge.
Overslaget for kap. 5440, underpost 24.1 Driftsinntekter er redusert med 4 800 mill. kroner, til 154 400 mill. kroner. Reduksjonen skuldast i hovudsak lågare prisføresetnader for gass og lågare gassal. Overslaget baserer seg på ein oljepris for 2019 på 559 kroner per fat. Det same som i revidert budsjett 2019.
Overslaget for kap. 5440, underpost 24.2 Driftsutgifter er auka med 3 100 mill. kroner, til 30 500 mill. kroner. Auken skuldast høgare produksjonskostnader grunna høgare priser på straum og CO2-kvotar, og auka vedlikehald på enkelte felt. Vidare skuldast det høgare tariff- og skiperkostnader, og auka kostnader til kjøp av tredjepartsgass.
Overslaget for kap. 5440, underpost 24.4 Avskrivingar er auka med 3 000 mill. kroner, til 23 200 mill. kroner. Auken skuldast større sal av olje frå fleire store felt som Gullfaks, Åsgard og Oseberg.
Overslaget for kap. 5440, underpost 24.5 Renter av statens kapital er redusert med 100 mill. kroner, til 2 800 mill. kroner. Nedgangen skuldast oppdatert rentesats.
Endringar i underpostar omtalt over medfører at overslaget over SDØEs driftsresultat er redusert med 10 800 mill. kroner, frå 106 600 mill. kroner til 95 800 mill. kroner.
Overslaget for netto kontantstraum frå SDØE er redusert frå 100 700 mill. kroner til 94 800 mill. kroner, ein reduksjon på 5 900 mill. kroner frå gjeldande løyving for 2019.
Kap. 2490 NVE Anlegg
Post 24 Driftsresultat
Tabell 2.2 Endringar under kap. 2490 NVE Anlegg (i 1 000 kr)
Kap./post/ underpost | Nemning | Gjeldande overslag | Nytt overslag | Endring | |
|---|---|---|---|---|---|
2490 | 24.1 | Driftsinntekter | -80 000 | -128 500 | -48 500 |
24.2 | Driftsutgifter | 75 300 | 125 800 | 50 500 | |
24.3 | Avskrivingar | 4 500 | 2 500 | -2 000 | |
24.4 | Renter av statens kapital | 200 | 200 | - | |
24.5 | Investeringsformål | 0 | 0 | - | |
24.6 | Reguleringsfond | 0 | 0 | - | |
24 | Driftsresultat | 0 | 0 | - | |
Overslaget for kap. 2490, underpost 24.1 Driftsinntekter er auka med 48,5 mill. kroner, til 128,5 mill. kroner. Auken skuldast høgare omsetning som følgje av auka oppdragsmengd.
Overslaget for kap. 2490, underpost 24.2 Driftsutgifter er auka med 50,5 mill. kroner, til 125,8 mill. kroner. Auken heng saman med utgiftsauke til varer, tenester og underleveransar som følgje av den auka oppdragsmengda.
Overslaget for kap. 2490, underpost 24.3 Avskrivingar er redusert med 2 mill. kroner, til 2,5 mill. kroner. Reduksjonen heng saman med lågare investeringar enn venta og at fleire eigedelar er ferdig avskrivne eller selde.
Ovannemnde endringar medfører inga endring i NVE Anlegg sitt driftsresultat.
Post 45 Større utstyrsanskaffingar og vedlikehald, kan overførast
NVE har behov for ein hengar for å kunne transportere stort og tungt utstyr, som for eksempel gravemaskiner, over store avstandar i Nord-Noreg. Det er behov for slikt utstyr ved beredskapshendingar og lignande når det er fare for liv og eigedom. I region nord er det vanskeleg å leige tilsvarande utstyr på kort varsel. Dagens hengar er utrangert og må skiftast ut.
På denne bakgrunnen er det foreslått løyvd 2 mill. kroner. Ein viser til tilsvarande reduksjon under kap. 1820, post 01 Driftsutgifter.
Kap. 4810 Oljedirektoratet
Post 01 Gebyrinntekter
Det er foreslått å auke løyvinga med 5,5 mill. kroner, til 32 mill. kroner. Ein viser til omtale og tilsvarande utgiftsauke under kap. 1810, post 01 Driftsutgifter.
Post 02 Oppdrags- og samarbeidsinntekter
Det er foreslått å redusere løyvinga med 18,5 mill. kroner, til 100,5 mill. kroner. Ein viser til omtale og tilsvarande utgiftsreduksjon under kap. 1810, post 23 Oppdrags- og samarbeidsverksemd.
Kap. 4820 Noregs vassdrags- og energidirektorat
Post 02 Oppdrags- og samarbeidsinntekter
Det er foreslått å redusere løyvinga med 17 mill. kroner, til 72 mill. kroner. Ein viser til omtale og tilsvarande utgiftsreduksjon under kap. 1820, post 23 Oppdrags- og samarbeidsverksemd.
Kap. 5582 Sektoravgifter under Olje- og energidepartementet
Post 70 Bidrag til kulturminnevern i regulerte vassdrag
Sektoravgift for kulturminnevern i regulerte vassdrag dekkjer kostnader til arkeologiske undersøkingar i vassdrag. Det er konsesjonar gitt før 1960 der det ikkje vart gjort arkeologiske undersøkingar ved utbygging, som er omfatta av ordninga når konsesjon skal fornyast eller vilkåra reviderast. Konsesjonæren betaler eit beløp basert på størrelsen på produksjonen i reguleringsmagasinet.
Det er foreslått ei løyving på 1,5 mill. kroner i 2019. Innbetalinga er knytt til fornya reguleringskonsesjon for Mesnavassdraget, Hjertvatn og Håkvikvassdrag.
Kap. 5685 Aksjar i Equinor ASA
Post 85 Utbytte
Equinor ASA har utbetalt til saman 14 744 mill. kroner i utbytte til Olje- og energidepartementet for tredje og fjerde kvartal 2018 og første kvartal 2019. For budsjettformål er det lagt til grunn eit kontantutbytte for andre kvartal 2019 tilsvarande utbetalinga for første kvartal 2019.
Det er på den bakgrunnen foreslått å auke løyvinga med 530 mill. kroner, til 20 000 mill. kroner.