3 Avgjerda i EØS-komiteen
EØS-komiteen vedtok 25. juni 2002 ved avgjerd nr. 93/2002 at vedlegg XXII (selskapsrett) til EØS-avtala skal endrast ved at rådsforordning (EF) nr. 2157/2001 av 8. oktober 2001 om vedtektene for det europeiske selskap (SE) vert teken inn i EØS-avtala.
Artikkel 1 slår fast at rådsforordning (EF) nr. 2157/2001 av 8. oktober 2001 om vedtektene for det europeiske selskap (SE) skal leggjast til som nytt nr. 10a i vedlegg XXII til EØS-avtala. Det vert vidare presisert at for føremålet med EØS-avtala skal føresegnene i forordninga gjelde med følgjande tilpassingar: i vedlegg I til forordninga vert dei islandske, liechtensteinske og norske nemningane for «allmennaksjeselskap» lagde til, og i vedlegg II til forordninga vert dei islandske, liechtensteinske og norske nemningane for «allmennaksjeselskap og aksjeselskap» lagde til.
Artikkel 2 slår fast at teksta til forordninga på islandsk og norsk, som vil verte kunngjord i Tidend for Dei europeiske fellesskapa, skal vere gyldig.
Artikkel 3 slår fast at avgjerda tek til å gjelde 26. juni 2002, på det vilkåret at EØS-komiteen har motteke alle meldingar etter artikkel 103 nr. 1 i avtala.
Artikkel 4 slår fast at avgjerda skal kunngjerast i EØS-avdelinga av og EØS-tillegget til Tidend for Dei europeiske fellesskapa.
Etter artikkel 103 nr. 1 skal EFTA-statane innan seks månader frå tidspunktet då avgjerda vart vedteken (25. juni 2002), melde frå til dei andre EØS-statane at dei forfatningsrettslege krava er stetta, og for Noreg sin del vil det seie at det er innhenta samtykke frå Stortinget til godkjenning av avgjerda i EØS-komiteen.