1 Lønsregulering for arbeidstakarar i det statlege tariffområdet med verknad frå 1. mai 2007
1.1 Lønsforhandlingane mv. for andre avtaleår per 1. mai 2007
Hovudtariffavtalen i staten for perioden 2006-2008 mellom staten v/ Fornyings- og administrasjonsdepartementet og tenestemennenes hovudsamanslutningar (LO Stat, Yrkesorganisasjonanes Sentralforbund Stat (YS Stat), Akademikerne, Hovudorganisasjon for universitets- og høgskoleutdanna (Unio)) har ei reguleringsføresegn for andre avtaleår. Stortinget samtykte i dette ved behandlinga av Innst. S. nr. 235 (2005-2006), jf. St.prp. nr. 69 (2005-2006).
Forhandlingane vart innleidde 13. april 2007 med at organisasjonane og staten la fram og grunngav sine krav. Rapport frå Statistikk- og berekningsutvalet i staten vart omdelt. Fram til 30. april gjennomførte partane sonderingar i ei rekkje møte. Den 30. april kl. 23.00 la staten fram sitt endelege tilbod/krav. Hovudsamanslutningane aksepterte tilbodet kl. 01.50, 1. mai 2007. Endeleg justert protokoll av 9. mai 2007 følgjer som vedlegg 1 med undervedlegg 1 – 4.
Generelt
Oppgjeret for andre avtaleår har ein årslønsauke på om lag 4,8 %. Oppgjeret er om lag på linje med arbeidslivet elles.
Generelle tillegg på hovudlønstabellen – andre avtaleår
Det er gitt generelle tillegg på hovudlønstabellen i staten – tabell A – i form av ein kombinasjon av krone- og prosenttillegg med verknad frå 1. mai 2007. Frå lønstrinn 1 til og med lønstrinn 43 vert det gitt eit tillegg på 4 300 kroner, medan det vert gitt eit prosenttillegg på 1,35 % frå lønstrinn 44 til og med lønstrinn 77. Det vert gitt eit tillegg på 8 200 kroner frå lønstrinn 78 og oppover. Ny hovudlønstabell følgjer som vedlegg 1, undervedlegg 2.
Særlege tillegg – andre avtaleår
Frå 1. juli 2007 vert alle arbeidstakarar på lønsrammer justerte med eit lønstrinn. Begynnarløn i lønstrinn 29 vert justert til lønstrinn 30. Stillingane som Forskar, Førsteamanuensis, Førstelektor og Førstebibliotekar vert overførd frå lønsspenn til ny lønsramme. Begynnarløn er auka for personar med høgare akademisk utdanning og stipendiatar som vert tilsette etter 1. juli 2007.
Lokale forhandlingar – andre avtaleår
Med verknad frå 1. juli 2007 skal det førast lokale forhandlingar innafor ei økonomisk ramme på 0,4 % per dato av lønsmassen, som vert dekt av midlar frå kap. 2315. I tillegg kjem 0,1 % som er midlar verksemdene sjølve må dekkje innanfor allereie gitte løyvingar. Samla ramme for dei lokale forhandlingane vert såleis 0,5 % per dato av lønsmassen innanfor kvart enkelt forhandlingsområde. Partane oppretthald kvinneføringa i dei lokale forhandlingane.
1.2 Lønsforhandlingane mv. for andre avtaleår for tenestemenn tilslutta Norges Ingeniørorganisasjon (NITO) og Norges Farmaceutiske Forening (NFF)
To yrkesorganisasjonar, NITO og NFF, har sjølvstendig forhandlingsrett med staten utan å vere knytte til ei hovudsamanslutning. Desse organisasjonane har etter lov om offentlege tenestetvistar av 18. juli 1958 eigne hovudtariffavtalar med staten.
Det har vore ført parallelle forhandlingar mellom staten v/Fornyings- og administrasjonsdepartementet og NITO/NFF. Fram til 30. april 2007 gjennomførte partane sonderingar i ei rekkje møte. Den 1. mai kl. 00.45 la staten fram sitt endelege tilbod/krav. NITO og NFF aksepterte tilbodet kl. 02.30, 1. mai 2007. Endeleg justert protokoll av 9. mai 2007 følgjer som vedlegg 2 med undervedlegg 1 – 4 til vedlegg 1 til proposisjonen.
1.3 Lønsregulering mv. for andre avtaleår for embets- og tenestemenn som ikkje vert dekte av hovudtariffavtalen
Det er ein føresetnad frå Fornyings- og administrasjonsdepartementet at lønsregulering frå 1. mai 2007 mv. vert gjort gjeldande for alle embets- og tenestemenn, også dei som ikkje vert dekte av hovudtariffavtalane. Fornyings- og administrasjonsdepartementet ber difor om fullmakt til å gjere avtalane gjeldande for arbeidstakarar som ikkje er medlem av organisasjonar med forhandlingsrett – og som difor ikkje direkte vert omfatta av dei avtaler som er gjorde.
Embets- og tenestemenn i stillingar som er tekne ut av hovudtariffavtalen, får sine løns- og arbeidsvilkår administrativt fastsette i kontrakt, og er difor ikkje omfatta av denne lønsreguleringen.