3 Endringar på statsbudsjettet for 2007

Samla bruttoutgifter ved lønsreguleringa for arbeidstakarar i det statlege tariffområdet per 1. mai 2007, er for tidsrommet 1. mai - 31. desember 2007 rekna til 1 062 mill. kroner. Løyvingsanslaget byggjer på lønsmassen i det statlege tariffområdet per 01.10.2006. Den faktiske bruttoverknaden av lønsoppgjeret i Statsbudsjettet for 2007 vil difor truleg verte noko høgare enn dette.

Overslaget omfattar alle tilsette som går inn under hovudtariffavtalane i staten. Meirutgifter som følgje av auka satsar for overtid og arbeidsgivaravgift er med.

Meirutgifter i samband med lønsreguleringane for forvaltningsorgan med særskilde fullmakter og forvaltningsbedrifter vert dekte innanfor budsjetta til verksemdene.

Verksemder med arbeidstakarar som får løn administrativt fastsett i kontrakt, må dekkje meirutgifta av lønsregulering innanfor eksisterande budsjett.

Etter fråtrekk av det ovanfor nemnde er meirutgiftene rekna til 800 mill. kroner. Etter vanleg praksis vert slike meirutgifter dekte ved at det vert ført opp løyving under kap. 2315 Lønsregulering for arbeidstakarar i det statlege tariffområdet, som Finansdepartementet får fullmakt til å fordele.

Under kap. 1503 Midlar til opplæring og utvikling av tillitsvalde post 70 Tilskot, vert det foreslått ein auke på 5,092 mill. kroner. Forslaget er utrekna på grunnlag av årsverk og lønsmasse i staten per 1. oktober 2006, og er såleis ikkje ein konsekvens av lønsoppgjeret i 2007, men ein justering som følgje av avtale inngått ifm. lønsoppgjeret i 2006. Løyvinga er inklusive 10 mill. kroner til skoleverket som ein del av omstillingsperioda frå 01.05.2004 – 30.04.2008, jf. inngått avtale mellom partane.

Under kap. 1541 Pensjonar av statskassen, post 01 Driftsutgifter, vert det foreslått ein auke med 0,971 mill. kroner som følgje av auken i grunnbeløpet (G) i folketrygda.

Under kap. 1542 Tilskot til Statens Pensjonskasse, vert det foreslått ein auke i overslagsløyvinga med netto 479,834 mill. kroner. Meirutgifter til løpande pensjonar, som følgje av endring i grunnbeløp (G) i folketrygda, utgjer 654,671 mill. kroner. Samtidig er overslaget for premieinntekter justert opp med 155,219 mill. kroner som ein følgje av lønsoppgjeret. Netto tilskot til Statens Pensjonskasse på kap. 1542 vert difor auka med 479,834 mill. kroner. Auken fordeler seg med 474,285 mill. kroner under post 01 og 5,549 mill. kroner under post 70.

Under kap. 1546 Yrkesskadeforsikring og kap. 1547 Gruppelivsforsikring medfører auken i grunnbeløpet nye overslag for løyvingsanslaget. Auken utgjer 1,621 mill. kroner under kap. 1546 og 3,270 mill. kroner under kap. 1547.

Det er avsett midlar til dekning av meirutgiftene ved lønsregulering for arbeidstakarar i det statlege tariffområdet mv. under kap. 2309 Tilfeldige utgifter, post 01 Driftsutgifter. Løyvinga under kap. 2309 Tilfeldige utgifter vil verte redusert i samband med proposisjon om ny saldering av statsbudsjettet 2007 til hausten.

Under kap. 635 Venteløn vart det i samband med Revidert nasjonalbudsjett foreslått ein auke i løyvinga med om lag 5 mill. kroner, jf. St.prp. nr. 69 (2006-2007).