9,4 millionar kroner til 16 lokale og regionale parkprosjekt

Søknadane til Verdiskapingsprogrammet for lokale og regionale parkar er no vurdert. 16 lokale og regionale parkprosjekt får til saman 9,4 millionar kroner i støtte. - Den store interessa for programmet og dei mange gode søknadane viser at dette kan vere ein framtidsretta måte å drive bygdeutvikling på, seier Kommunal- og regionalminister Liv Signe Navarsete.

Hovudmålet med tilskotsordninga er å auke verdiskaping og næringsutvikling i avgrensa landskapsområde med særskilde natur- og kulturverdiar. Parkane skal fremje heilskapleg stad- og næringsutvikling, og levande bygdesamfunn i område med slike verdiar.

Kommunal- og regionaldepartementet (KRD) ynskjer å stø opp om initiativ som tek sikte på å etablere og vidareutvikle parkar som strategi for lokal mobilisering. I arbeidet med parkar er det viktig med eit langsiktig og forpliktande samarbeid mellom regionale styresmakter, næringsliv, interessegrupper og menneskje som bur og lever i slike landskapsområde.

- I utveljinga av prosjekt har KRD lagt vekt på fleire forhold. Kvalitet i søknaden og gjennomføringsevne står sjølvsagt sentralt. Vi har lagt stor vekt på god lokal forankring og samarbeid om parkkonseptet. Vi ynskjer også at verdiskapingsprogrammet skal ha overføringsverdi til andre, og legg vekt på kommunikasjon og erfaringsutveksling. Dette gjeld både mellom parkar som er godt etablerte, men også for parkar som no er under etablering. Vi ynskjer at alle parkane som får støtte kan utvikle seg til å bli ei kjelde til inspirasjon og kunnskap for andre som er interesserte i park som modell for bygdeutvikling, seier statsråden.

Dei prosjekta som får støtte i 2012 er:

Søkjar	Tittel	Innvilga beløp
Telemarkskanalen regionalpark	Verdiskaping basert på særprega natur- og kulturressurser i kanallandskapet	1 900 000
Grue kommune	PROPARK - produktutvikling i park	1 000 000
Magma Geopark	Verdiskapning og næringsutvikling i Magma Geopark	800 000
Numedalsutvikling IKS	Regionalpark Numedal - sammen står vi sterkere	400 000
Norsk Kystkulturakademi AS	Forprosjekt Solund Kulturlandskapspark	373 500
DL Sigmund Vereide, Agro Business Park SA	Næringsutvikling i Naustdal/Gjengedal lvo	240 000
Østfold fylkeskommune v/Regionalpark Haldenkanalen	1) Merkevarestrategi for Regionalpark Haldenkanalen 2) Regionalpark Haldenkanalen – Stedsanalyse 3) Regionalpark Haldenkanalen – Næringsanalyse 4) Kanalprosjektet Haldenkanalen - Dalslands Kanal	565 000
Nærøyfjorden Verdsarvpark	Revisjon av Parkplan for Nærøyfjorden Verdsarvpark	175 000
Bioforsk Nord Tjøtta	Forprosjekt Tjøtta-Alstahaug landskapspark	137 500
Stalheim Landskapspark	Forprosjekt "Frå frø til øl og brød"	125 000
Rendalen kommune	Forprosjekt - Lokal park Rendalen	115 000
Stiftinga Geirangerfjorden Verdsarv	Grøn Fjord 2020 - vår regionale parkforvaltning og modell	875 000
Valdres Natur- og Kulturpark	Hytte i Valdres	918 500
Varanger Næringssenter AS	Varangerhalvøya- Natur-og kulturpark som samarbeidsmodell	800 000
Grane Næringsutvikling AS	Vefsna Regionalpark	765 500
Vikebygd Landskapspark	Næring og trivsel i Vikebygd Landskapspark	210 000

 

Kommunal- og regionaldepartementet sin pressetelefon: 22 24 25 00