8 Endringar i lov om pensjonsordning for stortingsrepresentanter

8.1 Fastsetjing av pensjonsgrunnlaget i enkje-, enkjemanns- og barnepensjon når den avdøde medlemmen har teke ut alderspensjon og døyr før fylte 67 år

I dette kapitlet foreslår departementet ei presisering i lov 12. juni 1981 nr. 61 om pensjonsordning for stortingsrepresentanter § 4c tredje ledd i tråd med forslaget frå departementet i kapittel 5 om endring i lov om Statens pensjonskasse § 42 tredje ledd.

Departementet foreslår at den særskilde etterreguleringa av pensjonsgrunnlaget som etter gjeldande føresegner skal gjerast ved fylte 67 år for alderspensjonistar, i staden skjer på dødsfallstidspunktet dersom pensjonisten døyr før omrekningstidspunktet, når pensjonen skal bereknast.

Departementet viser til lovforslaget, § 4c tredje ledd.

8.2 Økonomiske og administrative konsekvensar

Forslaget har ikkje vesentlege økonomiske eller administrative konsekvensar, og Statens pensjonskasse anslår kostnadene å være heilt marginale. Den omrekninga som etter forslaget skal gjerast på dødsfallstidspunktet, ville elles ha blitt gjord ved fylte 67 år i alderspensjonen til den avdøde.