3 Thorleif Hauglien

Thorleif Hauglien søkte i brev av 12. oktober 1997 om å få tida 1952-1961 som befal i Forsvaret godkjend som pensjonsgjevande i Statens Pensjonskasse. Han var engasjert i Forsvaret i 10 år, 4 år på engasjement og 6 år på åremål.

Befal som ikkje var fast tilsett fekk først medlemskap i Statens Pensjonskasse frå 1. mai 1961. Tida 1952-1961 kan av den grunn ikkje godkjennast som pensjonsgjevande tenestetid. Søkjaren blei medlem i Statens Pensjonskasse 1. juni 1961 og var medlem fram til han slutta 24. juni 1967. Thorleif Hauglien søkte om at tida før medlemskapen skulle gje grunnlag for pensjon frå statskassa.

Kravet for å få pensjon frå statskassa er m.a. at søkjaren har tidlegare teneste i staten utan medlemskap i Statens Pensjonskasse. Pensjonen skal normalt bli gitt som tilleggspensjon til pensjon vedkomande får for teneste i innlemma stilling i Pensjonskassa, eller eventuelt som tilleggspensjon til pensjon frå fylkeskommunal eller kommunal pensjonsordning som har overføringsavtale med Statens Pensjonskasse. Vidare er det krav om samanhengande teneste i minst 2 år. Pensjon frå statskassa vil ikkje bli gitt for tid vedkomande tenestemann kan tene opp pensjon i Statens Pensjonskasse på ordinær måte. Dersom søkjaren har slutta i tenesta med rett til seinare pensjon, kan han ikkje få pensjon frå statskassa dersom han ville ha tent opp rett til full pensjon i fall han hadde halde fram som medlem til aldersgrensa for stillinga. Dersom han ikkje ville ha greidd å få full pensjon, kan han få tilleggspensjon avgrensa til skilnaden mellom full tenestetid og den tenestetid det ville ha vore mogleg for søkjaren å oppnå.

Thorleif Hauglien ville ha oppnådd 29 år i Pensjonskassa dersom han hadde stått i stillinga fram til aldersgrensa.

I brevet frå Arbeids- og administrasjonsdepartementet av 9. september 1998 til søkjaren blei det mellom anna sagt:

«Da De har fratrådt tjeneste med rett til oppsatt pensjon i 1967, og kunne ha opptjent full pensjon i Statens Pensjonskasse på ordinær måte, har Arbeids- og administrasjonsdepartementet ikke anledning til å innvilge Deres søknad om pensjon av statskassen.»

Søkjaren klaga på departementet si avgjerd i brev av 18. september 1989, og bad om at saka blei lagt fram for Stortinget til endeleg avgjerd. Søkjaren ønskjer å få medrekna heile den perioden han var tilsett i Forsvaret fullt ut. Denne tida gav ikkje rett til medlemskap i Pensjonskassa.

Departementet har seinare kome til at søkjaren kan få medrekna eitt år, då søkjaren berre ville ha fått 29 år i Pensjonskassa om han hadde stått i stillinga fram til aldersgrensa. Dette er i samsvar med dei retningsliner som er trekte opp.

Arbeids- og administrasjonsdepartementet tilrår at Thorleif Hauglien får betra sin pensjonsansiennitet med eitt år på vilkår som nemnt.