1 Lønsregulering for arbeidstakarar i det statlege tariffområdet med verknad frå 1. mai 2006

1.1 Lønsforhandlingane mv. per 1. mai 2006

Forhandlingane mellom staten v/Fornyings- og administrasjonsdepartementet og tenestemennenes hovudsamanslutningar (LO Stat, Yrkesorganisasjonanes Sentralforbund Stat (YS Stat), Hovudorganisasjon for universitets- og høgskoleutdanna (Unio)) og Akademikerne, om ny hovudtariffavtale i staten for perioden 2006 – 2008, vart innleidde 31. mars 2006 med at organisasjonane og staten la fram og grunngav sine krav.

Forhandlingane heldt fram til den 28. april. På bakgrunn av statens krav/tilbod den 28. april, kravde LO Stat, YS Stat, Unio og Akademikerne forhandlingane avslutta på møtet den 28. april kl. 19.30, og det vart konstatert brot i forhandlingane. Riksmeklingsmannen vart i samsvar med tenestetvistlova § 14 varsla same dag om brot i forhandlingane.

Meklinga mellom partane vart opna 2. mai 2006 hos Riksmeklingsmannen og heldt fram i møte til og med 24. mai 2006.

Riksmeklingsmannen la om morgonen 24. mai 2006 fram ei skisse til ny hovudtariffavtale i staten. Representantar frå Akademikerne sa nei til skissa frå Riksmeklingsmannen og det vart dermed brot i meklinga mellom Akademikerne og staten v/Fornyings- og administrasjonsdepartementet. Dette førte til at Akademikerne gjekk ut i streik.

Representantane frå LO Stat, YS Stat, Unio og staten v/Fornyings- og administrasjonsdepartementet melde at dei ynskte å halde fram med samtalar med Riksmeklingsmannen på grunnlag av skissa. Med bakgrunn i dette la Riksmeklingsmannen i møte 24. mai 2006 fram forslag til ny hovudtariffavtale i staten med verknad frå 1. mai 2006. Staten godtok forslaget. LO Stat, YS Stat og Unio orienterte om at dei tilrådde meklingsresultatet og ville sende det ut til avrøysting. Svarfristen er sett til 26. juni 2006 kl. 12.00.

Hovudtrekka i Riksmeklingsmannen si møtebok av 24. mai 2006 (vedlegg 1 med undervedlegg 1 – 4) er som følgjer:

Generelt

Oppgjeret for første avtaleår har ein årslønsauke på om lag 3,9%. Oppgjeret er om lag på linje med arbeidslivet elles.

Generelle tillegg på hovudlønstabellen – første avtaleår

Det er gitt generelle tillegg på hovudlønstabellen i staten – tabell A – i form av ein kombinasjon av krone- og prosenttillegg med verknad frå 1. mai 2006. Frå lønstrinn 1 til og med lønstrinn 41 vert det gitt eit tillegg på 9000 kroner, medan det vert gitt eit prosenttillegg på 2,95% frå lønstrinn 42 til og med lønstrinn 74. Det vert gitt eit tillegg på 16 500 kroner frå lønstrinn 75 og oppover. Ny hovudlønstabell følgjer som vedlegg 1, undervedlegg 2.

Sentrale forhandlingar – første avtaleår

I første avtaleår skal det førast sentrale justeringsforhandlingar om endringar av lønsplasseringar for stillingar og stillingsgrupper innanfor ei økonomisk ramme på 0,5% per dato. Forhandlingsoppgjeret skal skje med verknad frå 1. juli 2006, og det er fredsplikt knytt til desse forhandlingane. Kvinner skal ha ein større del av potten enn ei pro rata fordeling tilseier.

Lokale forhandlingar – første avtaleår

Med verknad frå 1. august 2006 skal det førast lokale forhandlingar innanfor ei økonomisk ramme på 1,65% per dato av lønsmassen, som vert dekt av midlar som vert tildelte frå kap. 2315. I tillegg kjem 0,1% som er midlar verksemda sjølv må dekkje innanfor allereie gitte løyvingar. Samla ramme for dei lokale forhandlingane vert såleis 1,75% per dato av lønsmassen innanfor kvart enkelt forhandlingsområde.

Kvinner bør få ein større del av avsetninga til lokale forhandlingar enn pro rata tilseier. Det bør leggjast spesiell vekt på å vurdere forholdet mellom kvinner og menn sin innplassering i/og mellom stillingskoder ut i frå tilsvarande kvalifikasjonar, oppgåver og ansvar.

Kompetanseutvikling – heile tariffperioden

Det vert avsett til saman 40 mill. kroner til kompetanseutvikling for heile tariffperioden, 1. mai 2006 – 30. april 2008.

Av dette skal 30 mill. kroner nyttast til tiltak for organisasjons- og leiingsutvikling som skal føre til auka involvering av medarbeidarar/tillitsvalde, til metodar og verktøy for kompetanse- og karriereutvikling, til oppfølging av intensjonsavtalen om eit inkluderande arbeidsliv og til betre nyttiggjering av kompetansen til personar med etnisk minoritetsbakgrunn i statleg sektor.

10 mill. kroner skal nyttast til felles opplærings- og utviklingstiltak for leiinga og dei tillitsvalde i samarbeidskompetanse og medbestemming, med særleg utgangspunkt i hovudavtalen og hovudtariffavtalen i staten.

Seniorpolitiske tiltak

For å motivere eldre arbeidstakarar til å stå lengre i arbeid, har partane vorte samde om virkemidlar for å utsetje avgang for eldre arbeidstakarar.

Alle arbeidstakarar i staten som har fylt 62 år vert gitt tenestefri med løn i to dagar per kalenderår. Frå og med fylte 65 år vert det gitt tenestefri med løn i til saman fem dagar per kalenderår.

I tillegg til dette, kan arbeidsgjevar lokalt, etter avtale med dei tillitsvalde, etablere ordningar innanfor rammene av ytterlegare fire dagar tenestefri for arbeidstakarar som har fylt 62 år og sju dagar for arbeidstakarar som har fylt 65 år. Dersom det lokalt vert etablert slike ordningar, så skal desse omfatte alle arbeidstakarar.

Uttak av tenestefri med løn skal enten skje som heile dagar eller som redusert arbeidstid etter avtale med arbeidsgjevar. Alternativt kan det verte gjort avtale om at dagane vert godtgjort med løn.

Fornyings- og administrasjonsdepartementet og hovudsamanslutningane er vidare einige om å vurdere tiltak som kan motivere seniormedarbeidarane til å stå lenger i arbeid.

Fellesreglane

Det er ikkje føreteke store endringar i fellesreglane. Tilpassingar som følgje av endringar i arbeidsmiljølova, er innarbeidd i avtalen. Vidare er tillegget for pålagt arbeid på laurdag og søndag auka frå 22 kroner til 27 kroner per time. Adoptivforeldre har rett til to veker permisjon med løn i samband med omsorgsovertaking. Reglane for velferdspermisjonar er utvida slik at dei både omfattar velferds- og omsorgsgrunnar. Den øvre grensa for bustadlån til statstilsette er auka frå 750 000 kroner til 1 250 000 kroner. Det vil dessutan bli nedsett ei arbeidsgruppe som skal gå gjennom hovudtariffavtalen sine reglar om ytingar ved dødsfall og ved yrkesskade.

1.2 Lønsforhandlingane mv. for tenestemenn tilslutta NITO og Norges Farmaceutiske Forening (NFF)

To yrkesorganisasjonar, NITO og Norges Farmaceutiske Forening, har sjølvstendig forhandlingsrett utan å vere knytte til ein hovudsamanslutning. Desse organisasjonane har etter lov om offentlege tenestetvistar av 18. juli 1958 eigne hovudtariffavtalar med staten.

Det har vore ført parallelle forhandlingar mellom staten v/Fornyings- og administrasjonsdepartementet og NITO/Norges Farmaceutiske Forening. På bakgrunn av statens siste tilbod framsett den 28. april 2006, kravde organisasjonane same dag forhandlingane avslutta. I samsvar med tenestetvistlova § 14 vart Riksmeklingsmannen underretta om brotet i forhandlingane. Meklinga vart opna 2. mai og heldt fram til Riksmeklingsmannen i møte den 24. mai 2006 la fram eit forslag til ny avtale med verknad frå 1. mai 2006. Partane melde frå til Riksmeklingsmannen same dag at dei godtok det framsette forslaget.

Riksmeklingsmannen sine møtebøker av 24. mai 2006 for NITO og Norges Farmaceutiske Forening følgjer som høvesvis vedlegg 2 og 3 saman med undervedlegg 2 – 4 til vedlegg 1 til proposisjonen.

1.3 Lønsregulering mv. for embets- og tenestemenn som ikkje vert dekte av hovudtariffavtalen

Det er ein føresetnad frå Fornyings- og administrasjonsdepartementet at lønsreguleringa frå 1. mai 2006 mv. vert gjort gjeldande for alle embets- og tenestemenn, óg dei som ikkje vert dekte av hovudtariffavtalane. Fornyings- og administrasjonsdepartementet ber difor om fullmakt til å gjere avtalane gjeldande for arbeidstakarar som ikkje er medlem av organisasjonar med forhandlingsrett – og som difor ikkje direkte vert omfatta av dei avtalar som er gjorde.

Embets- og tenestemenn i stillingar som er tekne ut av hovudtariffavtalen, får sine løns- og arbeidsvilkår administrativt fastsett i kontrakt.