3 Endringar på statsbudsjettet for 2006

Samla bruttoutgifter ved lønsreguleringa for arbeidstakarar i det statlege tariffområdet per 1. mai 2006, er for tidsrommet 1. mai – 31. desember 2006 rekna til 1 627 mill. kroner. Løyvingsanslaget byggjer på lønsmassen i det statlege tariffområdet per 01.10.2005.

Overslaget omfattar alle tilsette som går inn under hovudtariffavtalane i staten. Meirutgifter som følgje av auka satsar for overtid og arbeidsgivaravgift er med.

Meirutgifter i samband med lønsreguleringane for forvaltningsorgan med særskilde fullmakter og forvaltningsbedrifter vert dekte innanfor budsjetta til verksemdene.

Verksemder med arbeidstakarar som får løn administrativt fastsett i kontrakt, må dekkje meirutgifta av lønsregulering innanfor eksisterande budsjett.

Etter fråtrekk av det ovanfor nemnde er meirutgiftene rekna til 1 200 mill. kroner. Etter vanleg praksis vert slike meirutgifter dekte ved at det vert ført opp løyving under kap. 2315 Lønsregulering for arbeidstakarar i det statlege tariffområdet, som Finansdepartementet får fullmakt til å fordele.

Under kap. 1502 Tilskot til kompetanseutvikling vert det for perioden 1. mai 2006 – 30. april 2008 avsett til saman 40 mill. kroner til kompetanseutvikling. Av dette skal 10 mill. kroner nyttast til felles opplærings- og utviklingstiltak for leiinga og dei tillitsvalde i samarbeidskompetanse og medbestemming. Det vert løyvd 20 mill. kroner i 2006 og 20 mill. kroner i 2007.

Under kap. 1503 Midlar til tenestemannsorganisasjonanes opplærings- og utviklingsarbeid post 70 Tilskot frå staten vert det foreslått ein reduksjon på 21,689 mill. kroner. Løyvinga er inklusive 10 mill. kroner til skoleverket som ein del av omstillingsperioda frå 01.05.2004 til 30.04.2008, jamfør inngått avtale mellom partane. Post 71 Bidrag frå arbeidstakarane vert foreslått redusert med 5,830 mill. kroner. Forslaget er utrekna på grunnlag av årsverk og lønsmasse i staten per 01.10.2005.

Under kap. 1541 Pensjonar av statskassen, post 01 Driftsutgifter, vert det foreslått ein auke med 0,506 mill. kroner som følgje av auken av grunnbeløpet (G) i folketrygda.

Under kap. 1542 Tilskot til Statens Pensjonskasse, vert det foreslått ein auke i overslagsløyvinga med netto 79,770 mill. kroner. Meirutgifter til løpande pensjonar som følgje av endring i grunnbeløpet (G) i folketrygda utgjer 345,973 mill. kroner. Samtidig er overslaget for premieinntekter til Statens Pensjonskasse vurdert på nytt, bl.a. på bakgrunn av nye opplysningar som følgjer av lønsoppgjera. Dette inneber at premieinntektene no er utrekna til å verte om lag 255,972 mill. kroner høgare enn det ein tidlegare gjekk ut frå. Netto tilskot til Statens Pensjonskasse på kap. 1542 vert difor foreslått auka med 79,770 mill. kroner. Auken fordeler seg med 72,385 mill. kroner under post 01 og 7,385 mill. kroner under post 70.

Under kap. 1546 Yrkesskadeforsikring og kap. 1547 Gruppelivsforsikring medfører auken i grunnbeløpet nye overslag for løyvingsbehovet. Auken utgjer 1,065 mill. kroner under kap. 1546 og 1,782 mill. kroner for kap. 1547.

Under kap. 635 Venteløn vert det foreslått ein auke i overslagsløyvinga med 8 mill. kroner under post 01 Driftsutgifter.

Det er avsett midlar til dekning av meirutgiftene ved lønsregulering for arbeidstakarar i det statlege tariffområdet mv. under kap. 2309 Tilfeldige utgifter, post 01 Driftsutgifter. Løyvinga under kap. 2309 Tilfeldige utgifter vil verte redusert i samband med proposisjonen om ny saldering av statsbudsjettet 2006 til hausten.