2 Nærmare om Daphne II

Daphne II har som føremål å medverke til å gje godt vern mot vald, medrekna sikring av fysisk og psykisk helse. Dette skal for det første skje ved å hindre og førebyggje alle former for vald mot barn, ungdom og kvinner, anten valden skjer offentleg eller privat, og for det andre ved å gje støtte til valdsofre, medrekna vern mot framtidig vald. I tillegg skal det skipast behandlingstilbod for overgriparar og valdsutøvarar. Daphne II skal dessutan støtte og oppmuntre både frivillige og andre offentlege organisasjonar som arbeider mot vald. Tiltaka skal medverke til skiping av samarbeid over landegrensene ved å fastleggje tverrfaglege nett og sikre informasjonsflyt og utveksling av røynsler. Dette vil auke medvitet rundt valdsproblematikken. Vidare skal det gjennomførast såkalla utfyllande tiltak i regi av Europakommisjonen. Det kan til dømes vere studium, seminar og ekspertmøte, med sikte på å kartleggje omfang, utvikle indikatorar for å måle verknaden av tiltak og politikk, og å identifisere nye tendensar og problemområde.

Både private og offentlege organisasjonar, universitet, forskingsinstitusjonar og andre institusjonar på lokalt plan som driv verksemd på dette området, kan søkje om midlar til prosjekt. For å ha rett til støtte må prosjekta omfatte minst to land og ikkje vare lenger enn to år. Europakommisjonen skal, i nært samarbeid med medlemsstatane, sikre iverksetjinga av programmet. Eit utval som er sammensett av representantar frå kvar stat som tek del i programmet, vil rettleie Europakommisjonen i samband med styringa av programmet. Europakommisjonen skal samarbeide med institusjonar og organisasjonar som driv verksemd for å hindre vald og hjelpe ofra for vald. Det vert særleg teke sikte på å oppmode til tverrnasjonalt samarbeid mellom frivillige og nasjonale, regionale og lokale styresmakter.

Den norske deltakinga i Daphne II har som mål å aktivisere fleire frivillige og offentlege organisasjonar til å delta som koordinatorar eller som partnarar. Europakommisjonen vurderer nøye søknadene om midlar, og dette stiller store krav til organisasjonane når det gjeld førarbeid og utforming av søknadene. Partnarskap mellom organisasjonane viser seg å vere nyttig, mellom anna fordi fagfelt vert haldne ved lag og vidareutvikla både nasjonalt og internasjonalt. Likestillingssenteret koordinerte frå 2002 arbeidet med formidling av informasjon og hjelp til aktuelle søkjarar, medrekna informasjon om at det er mogleg å delta som partnar i prosjekt som er koordinerte frå andre statar. Ansvaret for koordineringa ved deltaking i Daphne II vil skje i samråd med dei samfinansierande departementa.