2 Dagens situasjon og omtale av utbygginga

Osterøy kommune har om lag 7 200 innbyggjarar. Dagens veg mellom Hauge og Lonevåg har låg standard. Vegen er smal og svingete. Trafikken på Osterøy har hatt sterk vekst. Dette fører til konfliktar mellom ulike trafikantgrupper.

Utbygginga mellom Hauge og Lonevåg omfattar om lag 3,3 km ny riksveg. Av dette er om lag 1,5 km tunnel. Ei bru på vel 90 m ved Lonevåg og nye tilknytingsvegar mot Revheim og Hjellvik inngår i prosjektet som også omfattar korte strekningar med gang- og sykkelveg ved Hauge og ved Lonevåg. Prosjektet vil gi fullgod standard på tilnærma heile strekninga mellom Osterøybrua og kommunesentret Lonevåg. Utbygginga vil gi gevinstar for trafikktryggleik og gjere det enklare å komme til kommunesentret for ein stor del av innbyggjarane. Utbetring av vegen er også viktig for å effektivisere transporten for næringslivet.

Anleggsarbeida er planlagt å starte hausten 2008, med opning for trafikk i 2011. Reguleringsplanane for sjølve prosjektet blei godkjente i 2003, medan reguleringsplan for massedeponi blei godkjent i 2006.

Kostnadsoverslaget er 194 mill. 2006-kr. Omrekna til 2007-prisnivå er overslaget 198 mill. kr. Uvissa i overslaget er vurdert til å ligge innanfor +/- 10 pst.

Prosjektet sin netto nytte (NN) er rekna til – 90 mill. kr. Netto nytte pr. investert krone (NN/K) er rekna til – 0,4.