3 Nærmare om det femte likestillingsprogrammet til EU

Det femte likestillingsprogrammet er utforma i tråd med EU-politikken for integrering av kjønnsperspektiv og likestilling på alle politikkområde, og den strategien for likestilling som Europakommisjonen vedtok i juni 2000. Avgjerda har heimel i artikkel 13 i Amsterdamtraktaten. Tematisk vert det fokusert breitt på å fremje kjønnsperspektiv og likestilling på fem område:

• det økonomiske livet,

• lik deltaking og representasjon,

• sosiale rettar,

• det sivile livet,

• kjønnsroller og stereotypiar.

Programmet skal samordne, støtte og finansiere fleirnasjonale nettverk, medvitsaukande tiltak, analyse og metodeutvikling, og skal dessutan overvake, rapportere og evaluere situasjonen på innsatsområda. Dei fleirnasjonale aktivitetane under programmet vil omfatte utgreiingar, prosjekt, konferansar, statistikk- og metodeutvikling og oppnemning av ekspertgrupper, m.a. når det gjeld integreringsstrategien. Sentrale aktørar vil omfatte europeiske kvinneorganisasjonar og andre frivillige organisasjonar, arbeidslivsorganisasjonar og samanslutningar av lokale eller regionale styresmakter. Det nasjonale nivået vil få meir ansvar for koordinering av aktivitetar i høve til tidlegare praksis, t.d. nasjonal markering av ei europeisk likestillingveke, der det vert valt ut tema i fellesskap for heile EØS-området.

Programmet er ope for deltaking for søkjarstatane i Sentral- og Aust-Europa, og for Kypros, Malta og Tyrkia, i tillegg til EFTA/EØS-statane. Programmet skal støtte likestilling i søkjarstatane, og skal dessutan ta omsyn til at kvinner kan vere sårbare for dobbel eller fleirdobbel diskriminering. Programmet skal ikkje overlappe, men utfylle andre fellesskapsprogram som skal sikre ein kjønns-/likestillingsdimensjon, slik som DAPHNE-programmet til kamp av vald mot barn, unge og kvinner, kampen mot sosial utestenging, rammeprogrammet for forsking og utvikling og den sosialpolitiske dagsordenen.

Ein programkomité vil sikre innverknaden og deltakinga på nasjonalt nivå i forvaltinga av programmet. Komiteen vil m.a. ha innverknad på valet av tema for ei årleg likestillingsveke under programmet (jf. ovanfor), der arrangement både på nasjonalt og europeisk nivå vil setje søkjelyset på særleg aktuelle område i samband med likestilling. For 2001 er det gjort framlegg om å fokusere breitt på likelønsproblematikken.