7 Vurdering

Hovudmålet med avgjerda om å skipe eit rammeprogram for likestilling (2001-2005) er å medverke til å styrkje likestillingssamarbeidet i Europa, og å støtte opp under rammestrategien til Det europeiske fellesskapet (2001-2005) for å fremje likestilling på alle politikkområde. Målsetjingane for likestillingsarbeidet i EU er i hovudsak samanfallande med dei norske måla på området. Særleg interessant er den omfattande satsinga til EU når det gjeld integrering som strategi for likestillingsarbeidet, og utviklinga av metodar og instrument for oppfølging og evaluering av strategien.

Utviklinga av likestillingssamarbeidet med EU er nyttig for Noreg fordi det gjev norske organisasjonar og styresmakter tilgang til den metode- og kunnskapsutviklinga som finn stad innanfor ramma av EU. Samstundes gjev det Noreg høve til å profilere eigne røynsler og å gjere Noreg synleg som aktør og samarbeidspartnar i EØS-området. På bakgrunn av dette tilrår Barne- og familiedepartementet at Stortinget gjev samtykke til at Noreg tek del i ei avgjerd i EØS-komiteen om å ta inn det femte likestillingsprogrammet til EU (2001-2005) i EØS-avtala. Utanriksdepartementet sluttar seg til dette.