10 Ytingar til yrkesretta attføring

Løyvinga for 1999 under kap 2543 Ytingar til yrkesrettet attføring er på 4318 mill kr fordelt på 3420 mill kr til attføringspengar og 898 mill kr til attføringsstønader.

Attføringspengar

Med utgangspunkt i foreliggande informasjon om utbetalingane hittil iår og anslag på utbetalingane ut året vert det rekna med at det er eit meirbehov under attføringspengar på 80 mill kr grunna auken i grunnbeløpet. Det vert derfor foreslått at løyvinga for 1999 under kap 2543 Ytingar til yrkesretta attføring, post 70 attføringspengar aukar med 80 mill kr.

Attføringsstønader

Den sentrale faktoren i ordninga med stønad til hushaldsutgifter er ein sjablongberekna levekostnadsfaktor som skal dekke andre utgifter enn buutgifter. Dersom attføringssøkjar og eventuell ektefelle har samla nettoinntekter som er lågare enn levekostnadsfaktoren og buutgiftene til saman, skal det gjevast månadlege tilskott for å dekke differansen.

Levekostnadsfaktoren sjablongbereknast. Pr 1.9.99 vert satsane i levekostnadsfaktoren auka til:

• kr 4 680 per månad for trygda, ein auke på kr 110

• kr 2 810 per månad for ektefelle, ein auke på kr 70

• kr 1 670 per månad for kvart barn, ein auke på kr 40

Tilskottet kan maksimalt utgjere kr 5 220 pr månad, ein auke på kr 130. Stønadsbeløp på under kr 100 per månad vert ikkje utbetalt.

Endra grunnbeløp og justering av levekostnadsfaktoren reknar ein med isolert sett vil medføre eit meirbehov på om lag 5 mill kr under løyvinga for attføringsstønad i 1999.

På bakgrunn av dette vert løyvinga for 1999 under kap 2543 Ytingar til yrkesretta attføring, post 71 attføringsstønad foreslått auka med 5 mill kr.