1 Formål og hovudoversikt

1.1 Formål

Forsvarsdepartementet legg i denne proposisjonen fram forslag om visse endringar i løyvingar i forsvarsbudsjettet for 1997. Formålet er å skape samsvar mellom løyvingane under dei einskilde kapittel og postar og dei endringane i budsjettføresetnadene som har skjedd sidan forsvarsbudsjettet for 1997 vart utarbeidd.

Saker Stortinget bør informerast spesielt om vert omtala under del I Formål og hovudoversikt og bak under del III Spesielle saker. Endringane på kapittel/post kjem fram under vedtaksdelen i denne proposisjonen.

1.2 Forhold som endrar ramma for 1997-budsjettet

1.2.1 Nedtrekk grunna meirforbruk i 1996

Rekneskapsavsluttinga for 1996 synte eit meirforbruk under einskilde kapittel på totalt 29,370 mill kroner. Desse midlane vil verta dekte ved at ramma for 1997 vert foreslått redusert tilsvarande, fordelt på dei kapitla som stod for overskridingane.

1.2.2 Netto meirinntekter i 1997

I forhold til inntekter løyvde i SIII 1997 vert det ei netto meirinntekt på 136,425 mill kroner. Desse inntektene vert foreslått tillagt utgiftsramma for 1997 under tilvising til vedtakspost IV i St prp nr 1 (1996-97) som gir Forsvaret ei generell meirinntektsfullmakt for alle inntekter under Forsvarsdepartementet unntatt militære bøter. Brutto meirinntekt er på 144,947 mill kroner. Differansen skuldast at Forsvaret får behalde 75 prosent av inntekter ved sal av eigedomar, medan resten vert ført attende til Statskassen. Inntektssida er såleis foreslått auka med 144,947 mill kroner, medan utgiftssida er foreslått auka med 136,425 mill kroner.

1.2.3 Tilleggsløyving i 1997

Norske styrkar i utlandet, kap 1792, post 11 - 12,969 mill kroner

Som følgje av regelen om at berre 5 prosent av sum post 01 og 11 på same kapittel vert overført til neste budsjettår, vart 12,969 mill kroner ført attende til Statskassen i samanheng med overføring frå 1996 til 1997.

Grunna FN sin dårlige økonomi er det noko tilfeldig når midlar FN skuldar Noreg vert refundert. Dette betyr at refusjonar frå FN kan verta fleire år forsinka og ofte utbetalt på kort varsel mot slutten av året, noko som lett kan føra til at den nemnde regelen om 5 prosent vert overskriden. Forsvarsdepartementet foreslår difor at midlane vert løyvd på nytt i samanheng med handsaminga av denne proposisjonen.

1.3 Det økonomiske grunnlaget for omgrupperingsproposisjonen

1.3.1 Økonomisk grunnlag

Grunnlaget for omgrupperingane er vedteke budsjett (S III) for 1997 og seinare løyvingsendringar som Stortinget har vedteke, fullmakter gitt av Stortinget til Finansdepartementet, som ikkje kjem fram som løyvingsendring under dei einskilde departementa, og overførte midlar frå 1996. Det er ikkje tatt omsyn til Forsvarets del av lønskompensasjon for 1997, 114,997 mill kroner.

I 1997 er det for Forsvarsbudsjettet føreteke faktiske løyvingsendringar ved følgjande:

• St prp nr 63 (1996-97), jfr Innst S nr 295 (1996-97), «Omprioriteringar og tilleggsløyvingar på Statsbudsjettet 1997» medførde ei rammeauke på 32,900 mill kroner.

• St prp nr 79 (1996-97), jfr Innst S nr 274 (1996-97), «Om endringar i regulativ for tillegg mv til utskrevne vernepliktige mannskaper» medførde ei rammeauke på 15,360 mill kroner.

Vidare er følgjande endringar pålagt frå Finansdepartementet ved fullmakter frå Stortinget:

• Driftsreduksjon ifm Salderingsproposisjonen for 1997 på 94,835 mill kroner.

• Tildelte midlar (0,7 mill kroner) over kap 1630, post 01 Tiltak for å styrke den statlige økonomiforvaltningen.

• Tildelte midlar (0,5 mill kroner) over kap 1630, post 11 Tiltak for å styrke den statlige økonomiforvaltning.

• St prp nr 76 (1996-97), jfr Innst S nr 262 (1996-97), «Angående budsjettmessige virkningar av lønsoppgjeret for statstjenestemenn etter sentrale justeringsoppgjør 1996» medførde ei rammereduksjon på 16,971 mill kroner.

Departementet foreslår på denne bakgrunn, under forslag til vedtak, at løyvingane vert endra med ei auke på 120,024 mill kroner på utgiftsramma og ei auke på 144,947 mill kroner på inntektsramma.

1.3.2 Utgifter

1.3.3 Inntekter

Tala i tabellane 1.5 og 1.6 syner netto endringar på dei ulike postane. Utgiftstabellen er inklusiv fordeling av netto meirinntekter.