Samarbeidet skal fremje nordisk meirverdi ved at utvalde oppgåver blir belyst og løyst på nordisk nivå for å auke nordisk kompetanse og konkurransekraft.

Dette arbeidet blir også brukt som plattform i det europeiske og globale samarbeidet. Ministerrådet sin visjon er at Norden innan 2030 skal bli verdas mest berekraftige og integrerte region.

Helsemyndigheitene arbeider for å oppnå visjonen sine mål gjennom ei rekke initiativ i tilknyting til visjonen sine tre strategiske prioriteringar:

  • Eit grønt Norden
  • Eit konkurransedyktig Norden
  • Eit sosialt berekraftig Norden

Visjon 2030

For å følge opp visjon 2030 har alle sektorar i Ministerrådet utarbeidd nye samarbeidsprogram for 2025–2030 (norden.org). 

Det å fremje folkehelsa, styrke helseberedskapen, arbeide førebyggande og arbeide for å kjempe mot antimikrobiell resistens er viktige element for samarbeidsprogrammet under Ministerrådet for sosial- og helsepolitikk. 

Éin-helse perspektiv

Hausten 2024 blei det under svensk formannskap vedtatt ei ministererklæring om å kjempe mot antimikrobiell resistens i eit éin-helse perspektiv. Éin helse er ei tilnærming for å lage og gjennomføre programmer, politikk, lovgiving og forsking der fleire sektorar kommuniserer og jobbar saman for å oppnå betre folkehelse.

Våren 2025 blei ministererklæringa Promoting participation of persons with disabilities through inclusive, fair and accessible artificial intelligence (norden.org) vedtatt under finsk formannskap. 

Helsemyndigheitene deltar også i Ministerrådet for fisk, jordbruk, mat og skogbruk. Sunt kosthald, trygg mat og berekraftige matsystem er sentrale tema i dette arbeidet.

Motstandsdyktig i kriser

Dei nordiske landa har ein lang tradisjon for å yte gjensidig bistand ved kriser. Etter Nordisk helseberedskapsavtale av 2002 (lovdata.no) pliktar dei nordiske landa så langt som mogleg å:

  • yte kvarandre gjensidig assistanse i ei krisesituasjon
  • informere og konsultere kvarandre om tiltak som blir sett i verk i krisesituasjonar
  • fremje samarbeid ved å fjerne hindringar i nasjonale reglar mv.
  • samarbeide om erfaringsutveksling og kompetanseheving

Avtalen legg til rette for at landa kan etablere samarbeidsprosjekt, blant anna om øvingar, innsats ved kriser i utlandet, pandemiberedskap, atomberedskap og veterinærberedskap.

Erklæring om styrka samarbeid

I 2022 vedtok dei nordiske helseministrane ei Ministererklæring om styrka nordisk helseberedskap, som mellom anna seier at landa skal kartlegge hindringar ved akutt bistand over grensene, slik at bistanden kan bli endå betre.

Gjennom formannskapet i Ministerrådet for fisk, jordbruk, mat og skogbruk, vil Noreg bidra til arbeidet for berekraftige matsystem og sunt kosthald.