2 Omtale av utbygginga

Som det går fram av Prop. 182 S (2012–2013), utarbeidde Hitra, Frøya og Snillfjord kommunar og Sør-Trøndelag fylkeskommune i 2009 ein plan for delvis bompengefinansiert utbygging av delar av fv 714 mellom Stokkhaugen i Orkdal kommune og Sunde i Snillfjord kommune. Planen omfatta 10 delprosjekt. Følgjande tiltak og prosjekt inngjekk i utgangspunktet i dei ulike trinna:

Trinn 1:

• 1. Ny veg Bergsbakken/Ulvstubakken (opna for trafikk i 2011)

• 2. Etablering av to bomstasjonar

• 3. Valslagtunnelen med tilhøyrande veg (opna for trafikk i januar)

• 4. Fenestunnelen med tilhøyrande veg (opna for trafikk i 2013)

• 5. Mjønes – Brattstiåsen – Nessavatnet med Brattstiåstunnelen (opna for trafikk i 2013)

• 6. Ny veg og tunnelar i Snilldal inkl. Fossantunnelen og Snilldalstunnelen (planlagt opna for trafikk sommaren 2017)

• 7. Ny veg utanom Krokstadøra inkl. bru over Snilldalselva og Bergselva samt Ålitunnelen

Trinn 2:

• 8. Kryssing av Åstfjorden med bru og tunnel Tjørna – Mjønesaunet, og tunnel under Mjøneshatten

• 9. Utbetring av eksisterande veg langs Snilldalselva

• 10. Våvasstunnelen inkl. Våda ytre bru med tilhøyrande vegar

Alle delprosjekta er vist i kartskissa i fig. 2.1.

Som omtalt i Prop. 182 S (2012–2013), vart delprosjekt 3 Valslagtunnelen med tilhøyrande veg finansiert med statleg tilskot frå post 62 Skredsikring fylkesveg. Prosjektet vart derfor tatt ut av bompengeprosjektet.

Delprosjekt 7 Ny veg utanom Krokstadøra inkl. bruer over Snilldalselva og Bergselva samt Ålitunnelen er utsett til trinn 2 og slått saman med delprosjekt 9 Utbetring av eksisterande veg langs Snilldalselva.

Delprosjekt 10 Våvasstunnelen inkl. Våda ytre bru med tilhøyrande vegar er gjennomført i samband med delprosjekt 6 Ny veg og tunnelar i Snilldal. Fylkeskommunen har finansiert utbygginga for å sikre samordning med prosjektet E39 Harangen – Høgkjølen om uttak av stein.

Trinn 2 omfattar etter dette følgjande delprosjekt:

• Delprosjekt 7/9 Ny veg utanom Krokstadøra inkl. bruer over Snilldalselva og Bergselva samt Ålitunnelen

  Dagens fv 714 går gjennom Krokstadøra, som er kommunesenteret i Snillfjord. Vegen har fartsgrenser på 50 og 60 km/t og er utan gang- og sykkelveg. Prosjektet omfattar bygging av 3,7 km ny veg utanom Krokstadøra, og inkluderer to mindre bruer og ein kort tunnel. Prosjektet vil korte inn fv 714 med om lag 2 km. Dette inkluderer ny veg og planlagde utbetringar på strekningar i tidlegare delprosjekt 9. Dagens veg gjennom Krokstadøra vil bli omregulert til lokalveg. Det ligg føre vedtatt reguleringsplan for prosjektet.

• Delprosjekt 8 Kryssing av Åstfjorden med bru og tunnel Tjørna – Mjønesaunet, og tunnel under Mjøneshatten

  Prosjektet omfattar bygging av om lag 5,5 km ny veg på strekninga Saghølen – Stormyra med bru over Åstfjorden (725 m), to tunnelar (Slørdalstunnelen 2645 m og Mjønestunnelen 745 m) og korte strekningar med veg i dagen med tre kryssområde. Prosjektet vil korte inn fv 714 med om lag 6 km. Det ligg føre vedtatt reguleringsplan for prosjektet.

• Delprosjekt 10 Våvasstunnelen inkl. Våda ytre bru med tilhøyrande vegar

  Som omtalt er dette prosjektet gjennomført. Fylkeskommunen har finansiert utbygginga som er føresett å inngå i finansieringsopplegget for trinn 2.

Det er gjennomført ekstern kvalitetssikring (KS2) av prosjektstyringsunderlag, samfunnsøkonomisk analyse, kostnadsoverslag og trafikkgrunnlag for trinn 2. Ved den lokalpolitiske handsaminga av prosjektet vart det lagt til grunn eit samla kostnadsoverslag (styringsramme) for utbygginga på 1 626 mill. 2016-kr. Rekna om til 2017-prisnivå utgjer dette 1 667 mill. kr. Ekstern kvalitetssikrar tilrår ei styringsramme på 1 650 mill. 2016-kr og ei kostnadsramme på 1 840 mill. 2016-kr. I samråd med Sør-Trøndelag fylkeskommune blir resultatet frå den eksterne kvalitetssikringa lagt til grunn for utbyggings- og finansieringsopplegget for prosjektet. Rekna om til 2017-prisnivå gjev dette ei styringsramme på 1 691 mill. kr og ei kostnadsramme på 1 886 mill. kr.

Prosjektet sin samfunnsøkonomiske netto nytte er rekna til om lag -190 mill. 2017-kr. Netto nytte pr. budsjettkrone er rekna til -0,3. Netto nytte over totale kostnader er rekna til -0,1.