5 Finansieringsopplegg for trinn 2

Finansieringa av trinn 2 av utbygginga av prosjekt og tiltak på fv 714 Stokkhaugen – Sunde er basert på bompengar og fylkeskommunale midlar. Forslag til finansieringsplan er vist i tabell 5.1.

Fylkeskommunale midlar

I tråd med dei lokalpolitiske vedtaka er det lagt til grunn at 44 pst. av utbyggingskostnadene blir finansierte med fylkeskommunale midlar. Med utgangspunkt i ei styringsramme for prosjektet på 1 691 mill. 2017-kr, blir samla fylkeskommunalt bidrag 744 mill. kr. Av dette har fylkeskommunen alt løyvd 252 mill. kr til framskunding av delprosjekt 10.

Bompengar og bompengeopplegg

Det er lagt opp til at prosjekta i trinn 2 blir delfinansierte med bompengar ved å vidareføre eksisterande innkrevjing i bomstasjonane på Valslag og ved Våvatnet etter at trinn 1 er nedbetalt i 2018. Det er lagt til grunn innkrevjing i om lag 15 år, frå 2019 til 2033.

I tråd med Prop. 182 S (2012–2013), jf. Innst. 39 S (2013–2014), er det i dag ei ordning med forskottsbetaling der abonnentar med gyldig brikke og avtale får rabattar på mellom 30 og 50 pst. Trafikantar med abonnement i andre bompengeselskap får 10 pst. rabatt ved bruk av brikke. Takstgruppe 2 (køyretøy over 3 500 kg ekskl. køyretøy i køyretøygruppe M1) betalar i dag fem gongar taksten for takstgruppe 1 (køyretøy med tillaten totalvekt til og med 3 500 kg og køyretøy i køyretøygruppe M1).

I tråd med Prop. 1 S Tillegg 2 (2015–2016) er det lagt til grunn 20 pst. rabatt for køyretøy i takstgruppe 1 med gyldig brikke og brikkeavtale. Køyretøy i takstgruppe 2 får ikkje rabatt. For køyretøy i takstgruppe 1 er det også lagt til grunn eit passeringstak på 40 passeringar pr. bomstasjon pr. kalendermånad.

For at prosjektet skal vere nedbetalt i løpet av 15 år, er det rekna ut at gjennomsnittleg inntekt pr. passering må vere på 75 kr i bomstasjonen på Valslag og 58 kr i bomstasjonen ved Våvatnet, med dei føresetnadene som elles er lagt til grunn. Det er rekna med at ein takst for køyretøy i takstgruppe 2 som er fire gonger taksten for køyretøy i takstgruppe 1, vil gje same gjennomsnittlege belastning for køyretøy i takstgruppe 2 som med dagens takst- og rabattstruktur. Basert på dette er det førebels lagt til grunn følgjande grunntakstar i 2017-kr:

Det er føresett at takstane blir justerte i samsvar med prisutviklinga. I tråd med føresetnadene i Prop. 1 S (2016–2017) vil rekna gjennomsnittstakst bli nytta som grunnlag for justering av takstane. Gjennomsnittstaksten vil bli vurdert ut frå kjende faktorar som låneopptak, lånerente og utbyggingskostnad. Forslag til justeringar av takstane som følgje av dette føreset tilslutning frå fylkeskommunen som garantist. Elles gjeld dei til ei kvar tid gjeldande takstretningslinene for bompengeprosjekt.

Andre føresetnader for finansieringsplanen

Eventuell kostnadsauke ut over prisstigning skal dekkjast i samsvar med gjeldande retningsliner for bompengeprosjekt. Kostnadsauke opp til kostnadsramma skal følgjeleg dekkjast med fylkeskommunale midlar og bompengar etter same prosentvise fordeling som innanfor styringsramma. Eventuell auke ut over kostnadsramma er fylkeskommunen sitt ansvar og blir dekt av Sør-Trøndelag fylkeskommune.

Eventuelle kostnadsreduksjonar på inntil 10 pst. skal fordelast mellom fylkeskommunen og bompengeselskapet etter same prosentvise fordeling som innanfor styringsramma. Eventuelle reduksjonar på meir enn 10 pst. tilkjem fylkeskommunen.

Dersom økonomien i prosjektet blir dårlegare enn føresett, kan selskapet etter avtale med Vegdirektoratet auke realtakstane med inntil 20 pst. og forlengje innkrevjingsperioden med inntil 5 år.

Følgjande basisføresetnader er elles lagt til grunn for finansieringsplanen:

• Lånerente: 5,5 pst. dei første 10 åra, deretter 6,5 pst.

• Innskotsrente: 2,5 pst.

• Årleg prisstigning: 2,5 pst.

• Årlege innkrevjings- og driftskostnader: 6 mill. kr.

Med desse føresetnadene er innkrevjingsperioden knytt til finansiering av prosjekta i trinn 2 rekna til om lag 15 år. Brutto bompengeinntekter i 2017-kroner er rekna til om lag 1 300 mill. kr. Av dette er 947 mill. kr føresett nytta til å dekkje delar av investeringskostnadene, om lag 260 mill. kr til å dekkje finansieringskostnader og om lag 90 mill. kr til å dekkje innkrevjingskostnader og kostnader til drift av bompengeselskapet.

Det er rekna på eit optimistisk alternativ med følgjande føresetnader:

• ÅDT i opningsåret aukar med 5 pst.

• Lånerenta blir redusert til 4,0 pst.

• Elles er dei same føresetnadene som i basisalternativet lagt til grunn.

Med desse føresetnadene er innkrevjingsperioden rekna til om lag 13 år, dvs. ein reduksjon på om lag 2 år. Alternativt kan gjennomsnittstaksten reduserast frå 76 kr til 68 kr i bomstasjonen ved Valslag og frå 59 kr til 52 kr i bomstasjonen ved Våvatnet.

Det er også rekna på eit pessimistisk alternativ med følgjande føresetnader:

• Kostnadsauke opp til kostnadsramma.

• Årleg trafikkvekst blir redusert til 1,4 pst.

• ÅDT i opningsåret blir redusert med 12 pst.

• Lånerenta blir auka til 9 pst.

• Takstauke på 20 pst. ut over prisstigning etter to år.

Med desse føresetnadene er innkrevjingsperioden rekna til om lag 20 år, dvs. ein auke på om lag 5 år. Resultatet viser at finansieringsopplegget må vurderast som robust.