4 Trafikkgrunnlag

Trafikktala er baserte på registrert trafikk og regional transportmodell. I trinn 1 blei det sett opp bomstasjonar i Snillfjord kommune, ein på Valslag og ein ved Våvatnet. I 2015 var registrert årsdøgnstrafikk (ÅDT) 1 380 køyretøy i eksisterande bomstasjon på Valslag og 1 670 køyretøy i bomstasjonen ved Våvatnet. Tungtrafikken utgjorde om lag 11,5 pst.

Som følgje av tiltaka i trinn 2 reknar transportmodellen med ein trafikkauke på 8 pst. ved Valslag og 11 pst. ved Våvatnet samanlikna med registrert trafikk. Ein slik trafikkauke kan i all hovudsak forklarast med kortare reisetid med ny veg. Auken verkar ikkje urimeleg som følgje av at køyrelengda blir redusert med om lag 8 km. I finansieringsanalysen for trinn 2 er derfor dette lagt til grunn. Dette tilsvarar ein ÅDT etter fullføring i 2020 på om lag 1 490 køyretøy på Valslag og om lag 1 850 køyretøy ved Våvatnet.

For den generelle trafikkutviklinga er det lagt til grunn ein årleg trafikkvekst på 1,4 pst. i perioden 2016–2019, 1,3 pst. i perioden 2020–2023 og 0,9 pst. i perioden 2024–2033. Dette er i tråd med prognosane som vart utarbeidde for Sør-Trøndelag i arbeidet med Nasjonal transportplan 2014–2023.