4 Avgjerda i EØS-komiteen

Som ledd i samarbeidet i EØS vart det ved avgjerd i EØS-komiteen nr. 123/2001 av 26. oktober 2001 vedteke å innlemme europaparlaments- og rådsdirektiv 98/30/EF om felles regler for det indre marked for naturgass (gassmarknadsdirektivet) i vedlegg IV til EØS-avtala.

Avgjerda i EØS-komiteen inneheld ei innleiing og fire artiklar.

Innleiinga inneheld ei tilvising til EØS-avtala, særleg til artikkel 98 om høve til å endre m.a. vedlegga til avtala gjennom avgjerd i EØS-komiteen. Deretter vert det slått fast at gassmarknadsdirektivet skal innlemmast i EØS-avtala.

Artikkel 1 opplyser om at direktivet skal gå inn som nytt nr. 16 i vedlegg IV til EØS-avtala.

Det vert òg slått fast at fristen for gjennomføring av direktivet i den nasjonale lovgjevinga i Liechtenstein skal vere 1. juli 2002, for å sikre ei harmonisert gjennomføring av direktivet i lovgjevinga for gass og elektrisitet.

Artikkel 2 slår fast at direktivet skal ha same rettskrafta på norsk og islandsk som på språka til medlemsstatane i Fellesskapet.

Artikkel 3 fastset at avgjerda tek til å gjelde 27. oktober 2001, på det vilkåret at EØS-komiteen har motteke alle meldingar etter artikkel 103 nr. 1 i avtala. For Noreg inneber dette at det vert innhenta samtykke frå Stortinget etter § 26 andre leddet i Grunnlova.

Artikkel 4 slår fast at avgjerda i EØS-komiteen skal kunngjerast i EØS-avdelinga av og EØS-tillegget til Tidend for Dei europeiske fellesskapa (for EFTA-statane). Fristen for å melde frå til EØS-komiteen om at Stortinget har godkjent avgjerda i EØS-komiteen er 26. april 2002.