6 Presisering av opplysingsplikta om nemndshandsaming

6.1 Gjeldande rett

Det følgjer av § 10 andre ledd bokstav f at ei betalingsoppfordring skal opplyse om retten til å krevje handsaming av inkassotvistar i ei eiga klagenemnd (Inkassoklagenemnda).

6.2 Framlegget i høyringsbrevet

Justisdepartementet skreiv følgjande i høyringsbrevet:

«Ved lov 20. desember 2002 nr. 106 fekk inkassolova § 10 andre ledd ein ny bokstav f, som seier at betalingsoppfordringa skal nemne retten til å krevje nemndshandsaming etter § 22. Forbrukarrådet og Norske Inkassobyråers Forening har inngått avtale om ei klagenemnd for inkassosaker, som vart godkjend i statsråd 7. mars 2003. Nemnda har vore i arbeid sidan 1. april 2003. Retten til nemndshandsaming er avgrensa til tvistar mellom skyldnarar og foretak som driv inkassoverksemd, jf. inkassolova § 22 første ledd. Eigeninkasso fell såleis utanfor bortsett frå tilfelle der kreditor driv med oppkjøp av forfalne pengekrav og eiga inndriving av desse. Etter ordlyden i inkassolova § 10 andre ledd bokstav f gjeld plikta til å opplyse om retten til nemndshandsaming også i tilfelle der kreditor sjølv driv inn kravet. Etter Justisdepartementets syn bør det gå klart fram av lova at denne opplysningsplikta berre skal gjelde når eit krav blir drive inn av eit foretak som driv inkassoverksemd. Det blir derfor gjort framlegg om å presisere dette i § 10 andre ledd bokstav f.»

6.3 Høyringsfråsegnene

Forbrukarombodet og Kredittilsynet var dei einaste instansane som uttala seg om framlegget. Forbrukarombodet støtta framlegget. Kredittilsynet hadde m.a. følgjande merknader:

«Vi vil imidlertid peke på at den foreslåtte ordlyden også omfatter advokatforetak som driver inkassovirksomhet og foretak som driver oppkjøp av forfalte pengekrav og egen inndriving av disse. Enkelte advokatforetak som driver inkassovirksomhet har frivillig sluttet seg til eksisterende klagenemnd. Imidlertid kan verken disse foretakene eller oppkjøpsforetakene med hjemmel i § 5 fjerde ledd pålegges å slutte seg til en nemnd ettersom denne bestemmelsen bare henviser til bevilling gitt etter første ledd (fremmedinkasso). Dette innebærer at den foreslåtte bestemmelsen fortsatt vil rette seg mot foretak som ikke nødvendigvis er nemndstilsluttet.»

Kredittilsynet uttalte vidare:

«Som nevnt ovenfor, henvises det i inkassoloven § 5 fjerde ledd (vilkår om nemndstilslutning for inkassobevilling) bare til bevilling gitt etter først ledd (fremmed inkasso). Det ser ut til at dette ble inntatt i proposisjonen og loven etter forslag fra Kredittilsynet i vår høringsuttalelse datert 26. september 2001. Hensikten med forslaget var å presisere vilkår om nemndstilslutning bare skulle gjelde for foretaksbevilling, og ikke for personlig bevilling. På dette tidspunktet var det vedtatt at også oppkjøpsselskapene skulle underlegges krav om bevilling, men bestemmelsen trådte ikke i kraft før 1. januar 2002. Vi antar at det skyldes en forglemmelse at det ikke ble henvist også til bevilling etter tredje ledd. I inkassoloven § 22 første ledd, som er hovedbestemmelsen om nemndsbehandling, er betegnelsen «foretak som driver inkassovirksomhet» brukt. Dette begrepet omfatter etter loven § 2 både fremmedinkasso og oppkjøpsinkasso. Også forarbeidene til bestemmelsen (Ot. prp. nr. 115 (2001-2002) s. 14 og 39) taler for at det har vært intensjonen med bestemmelsen at Kredittilsynet skal kunne pålegge oppkjøpsselskapene å slutte seg til nemndsordning.»

6.4 Departementet sitt syn

Departementet gjer framlegg om ei endring i § 10 andre ledd bokstav f, slik at plikta til å opplyse om klagenemnda skal gjelde for alle inkassoforetak som driv inkassoverksemd på grunnlag av inkassoløyve, dvs. enten framandinkasso eller oppkjøpsinkasso. Opplysingsplikta vil dermed ikkje gjelde for advokatkontor som driv inkassoverksemd på grunnlag av advokatløyve. Dette heng saman med at det gjeld eigne klageordningar for advokatar. Dessutan bør ikkje foretak som sluttar seg til nemnda på frivillig basis, risikere å ikkje få dekt kostnadene ved å sende ut betalingsoppfordring fordi det ikkje er opplyst om klagenemnda, sjå inkassolova § 17 fjerde ledd andre punktum. Etter forslaget gjeld opplysingsplikta heller ikkje for kreditorar som driv inn krava sine sjølve, med unntak for oppkjøpsinkassoforetak.

Departementet ønskjer å presisere i lovteksten at Kredittilsynets høve til å stille vilkår om nemndstilknyting ikkje berre gjeld for foretak som driv framandinkasso, men også for foretak som driv oppkjøpsinkasso. I lovframlegget § 5 fjerde ledd er det derfor gjort klart at dette vilkåret kan stillast både ved løyve etter § 5 første ledd (framandinkasso) og § 5 tredje ledd (oppkjøpsinkasso). I lys av høyringsfråsegna frå Kredittilsynet vil departementet presisere at også dagens inkassolov gir heimel til å stille dette vilkåret både ved framandinkasso og oppkjøpsinkasso, jf. inkassolova § 5 fjerde ledd første punktum og § 5 tredje ledd andre punktum, jf. også Ot.prp. nr. 115 (2001-2002) s. 15 første spalte og s. 39 andre spalte.